Unsern Weihnachtsmakkt Is des net doll, Ihr liewe Leit, daß Darmstadt hot zur Weihnachtszeit hier uffem Makktplatz - wunderschee - e Pyramid aus Sachse steh? Schausteller hawwe's ausgemacht, im Erzgebierg hot mer gemacht des Riesending, elf Meter groß, wer`s sieht, der waaß, hier is was los. Es strengt sich - wie mer seje kann - so mancher ganz geheerich an, damit aach unsern Weihnachtsmakkt recht viele Leit so richdisch packt. So hot die Stadt nach langer Zeit, wie mer mit Freid kann seje heit, des Plaster endlich mol saniert, was mer beim Driwwergeh aach spiert. Die Bude all sin schee wie nie, drum zieht's aam immer widder hie, zumal des Rieseaagebot fer jeden was zu biete hot. Des dollste awwer diesjohr is ja wohl die Pyramid gewiß, wie mer sie selten finne dut; un des is hier fer Darmstadt gut. Was mer vermisse dut am End, un was mer besser mache könnt: Mehr Weihnachtsschmuck an manchem Haus, dann sieht der Makkt noch schenner aus. Doch mangelt's aach an manchem Licht, desweje werd net druff verzicht' uff unsern Weihnachtsmakkt zu geh, dann schließlich is er wunnerschee! Werner Rühl